Este sábado gozamos dunha magnífica xornada en familia na Illa de Cortegada, acompañados por un tempo espectacular que nos permitiu desfrutar ao máximo desta experiencia.

Acompañounos Rita, da Asociación AmarCarril, que nos guiou con gran profesionalidade e proximidade ao longo da visita. Grazas ás súas explicacións puidemos coñecer mellor a historia da illa, os restos da antiga aldea, as zonas que noutrora foron cultivadas polos seus habitantes e o enorme valor ambiental e patrimonial deste enclave único da ría de Arousa. Tamén tivemos a oportunidade de aprender máis sobre o marisqueo, unha actividade fundamental para a nosa contorna, e sobre a importancia de apoiar e consumir produto galego e de proximidade. Ademais, os máis pequenos gozaron especialmente das actividades preparadas por Rita, con xogos e unha divertida busca do tesouro que fixeron a visita aínda máis entretida e participativa.

Durante o percorrido descubrimos algúns dos lugares máis emblemáticos da illa, como a súa capela e o espectacular bosque de loureiros, considerado un dos máis extensos e singulares de Europa. Un paseo que nos permitiu entender mellor como a natureza e a historia se entrelazan neste espazo privilexiado.

A xornada completouse con tempo para pasear, bañarse, xogar e, sobre todo, compartir momentos de convivencia entre as familias, fortalecendo os lazos da nosa comunidade educativa nun entorno incomparable.

Desde a ANPA queremos expresar o noso agradecemento a Rita e á Asociación AmarCarril pola súa dedicación, disposición e polo cariño co que nos acompañaron durante toda a visita. Aquí podedes ver o resumo en vídeo que subiron ao seu instagram.

Grazas tamén a todas as familias participantes por contribuír a facer desta saída unha experiencia tan especial.

🌿🚤☀️ Seguimos creando experiencias para aprender, convivir e gozar xuntos da nosa contorna.